Ограничена гаранција на Apple од една (1) година само за производи од брендот на Apple
ПРАВО ЗА ЗАШТИТА НА ПОТРОШУВАЧИ
Едногодишната ограничена гаранција на Apple е доброволна гаранција на производителот. Таа обезбедува права кои се засебни од правата што се предвидени со прописите за заштита на потрошувачи, вклучително и, но без ограничување на, права што се однесуваат на несообразни производи.
Затоа, погодностите од eдногодишната ограничена гаранција на Apple претставуваат дополнување, а не замена на правата предвидени со прописите за заштита на потрошувачи.
Потрошувачите имаат право да избираат дали ќе бараат сервис според eдногодишната ограничена гаранција на Apple или според нивните права што произлегуваат од прописите за заштита на потрошувачи.
Важно: Условите и правилата на Едногодишната гаранција на Apple не се применуваат на побарувања по основ на прописите за заштита на потрошувачи.
За дополнителни информации за законот за заштита на потрошувачите, посетете ја веб-страницата на Apple (www.apple.com/legal/warranty/statutoryrights.html) или стапете во контакт со вашата локална организација за заштита на потрошувачи.
ШТО ОПФАЌА ОВАА ГАРАНЦИЈА?
Apple Distribution International of Hollyhill Industrial Estate Hollyhill, Cork, Republic of Ireland (или неговиот правен следбеник) („Apple“) гарантира дека хардверските производи и додатоци со брендот на Apple што се содржани во оригиналното пакување („Производ на Apple“) немаат дефекти во материјалите и изработката кога се користат во согласност со Упатствата за корисници на Apple, техничките спецификации и други објавени насоки за производи на Apple во период од ЕДНА (1) ГОДИНА од датумот на првичното купување во малопродажба од страна на купувачот кој е краен корисник („Гарантен период“). Вие ќе можете да ги користите погодностите кои произлегуваат од Едногодишната гаранција за вашиот производ на Apple преку локалните сервиси на Apple во повеќето делови од светот (погледнете го делот „Како да добиете сервис согласно гаранцијата“). Во случај на каков било дефект во материјалите и изработката, вие ќе можете директно да ги доставите вашите жалби барања до Apple, дури и во ситуации кога вашиот производ на Apple сте го купиле од трета страна.
Напомена: Сите побарувања истакнати по основ на Едногодишната гаранција на Apple ќе се уредат според условите наведени во овој документ за гаранција.
Покрај тоа, Apple ќе ви обезбеди пристап и до телефонска техничка поддршка за период од деведесет (90) дена од испораката на производите на Apple.
ШТО НЕ Е ПОКРИЕНО СО ОВАА ГАРАНЦИЈА?
Оваа гаранција не се однесува на хардверски производи што не се од брендот на Apple или каков било софтвер, дури и тогаш кога истите се спакувани или се продаваат заедно со хардверот на Apple.
Производите кои не се од брендот на Apple може да бидат придружени со гаранцијата на производителот, која обезбедува погодности кои се надополнување на правата согласно Законот за заштита на потрошувачите - проверете го пакувањето на вашиот производ и литературата за повеќе детали.
Погледнете го договорот за лиценцирање кој е приложен кон софтверот за информации за вашите права во однос на користењето на софтверот.
Може да добиете услуга во земјите од Европската економска област (ЕЕО) и Швајцарија без трошоци за испорака и ракување. Надвор од овој регион, опциите за услуга може да се ограничени. Ако дадена опција за услуга не е достапна за производот на Apple во таа земја, Apple или неговиот агент ќе ве извести за сите дополнителни трошоци за транспорт и ракување што може да настанат пред да ви се обезбеди услугата. Shipping and handling charges will not apply in countries where Apple does maintain an Apple Retail Store or Apple Authorized Service Provider („AASP“) (a list of current service locations is provided atsupport.apple.com/kb/HT1434).
Кога контактирате со Apple преку телефон, може да ви бидат наплатени надоместоци за повикот во зависност од вашата локација. Контактирајте со вашиот мрежен оператор за повеќе детали.
Оваа гаранција не важи за: (a) потрошни делови, какви што се батерии или заштитни футроли што се дизајнирани да се истрошат со тек на време, освен ако настане грешка како резултат на дефект во материјалите или изработката; (б) козметичко оштетување, вклучително и, но без ограничување на, гребнатини, набиени делови и скршена пластика на портите, освен ако настане грешка како резултат на дефект во материјалите или изработката; (в) оштетување предизвикано од користење со компонента на трето лице или производ што не ги исполнува спецификациите на производот на Apple (спецификациите на производот на Apple се достапни на www.apple.com под техничките спецификации за секој производ и достапни во продавниците; (г) оштетување предизвикано од несреќен случај, злоупотреба, погрешна употреба, оган, контакт со течност, земјотрес или друга надворешна причина; (д) оштетување предизвикано од ракување со производот на Apple спротивно на упатството за корисници, техничките спецификации или другите објавени насоки за производи на Apple; (ѓ) оштетување предизвикано од сервисирање (вклучително и надградби и експанзии) изведено од лице кое не е застапник на Apple или на oвластен давател на услуги на Apple („AASP“); (е) производ на Apple кој е изменет за да се промени неговата функционалност или способност без писмена дозвола од Apple; (ж) дефекти предизвикани од нормална употреба и трошење или друго како резултат на нормално стареење на производот на Apple; (з) доколку кој било сериски број е отстранет или замачкан од производот на Apple, или (ѕ) доколку Apple добие информации од релевантни јавни власти дека производот е украден или доколку не сте во можност да ја активирате лозинката или други мерки на безбедност дизајнирани да спречат неовластен пристап до производот на Apple и не може да докажете на ниту еден начин дека сте овластен корисник на производот (на пр. со давање доказ за купувањето).
ВАЖНИ ОГРАНИЧУВАЊА
Apple може да го ограничи сервисот согласно гаранцијата за Apple TV во земји каде што Apple или неговите овластени препродавачи го продаваат уредот.
Во однос на уредите iPad со мрежно покривање и уредите iPhone, гаранцијата ја покрива услугата во земјите од Европската економска област (ЕЕО) и Швајцарија. Надвор од овој регион, опциите за услуга може да се ограничени поради технички проблеми што не се под контрола на Apple – за информации поврзани со уредите iPad со мрежно покривање и уредите iPhone погледнете на www.apple.com/iphone/LTE/ и www.apple.com/ipad/LTE/.
Во однос на уредите iPad, гаранцијата не обезбедува покривање на услугата во Кина поради тешкотии со поврзувањето на Wi-Fi што не е под контрола на Apple.
ВАШИ ОДГОВОРНОСТИ
ДОКОЛКУ ВАШИОТ ПРОИЗВОД НА APPLE МОЖЕ ДА СКЛАДИРА СОФТВЕРСКИ ПРОГРАМИ, ПОДАТОЦИ И ДРУГИ ИНФОРМАЦИИ, ТРЕБА ПЕРИОДИЧНО ДА ПРАВИТЕ РЕЗЕРВНИ КОПИИ НА ИНФОРМАЦИИТЕ СОДРЖАНИ ВО МЕДИУМИТЕ ЗА СКЛАДИРАЊЕ НА ВАШИОТ ПРОИЗВОД НА APPLE ЗА ДА ГИ ЗАШТИТИТЕ СОДРЖИНИТЕ И КАКО ЕДЕН ВИД НА МЕРКА НА ПРЕТПАЗЛИВОСТ ВО СЛУЧАЈ НА МОЖНИ ОПЕРАТИВНИ ГРЕШКИ.
Пред да го донесете вашиот производ на Apple за сервис согласно гаранцијата, треба да направите посебна резервна копија на содржините во неговите медиуми за складирање, да ги отстраните сите лични информации и да ги исклучите сите безбедносни лозинки. Содржините во медиумите за складирање на вашиот производ на Apple може да бидат избришани, заменети и/или одново форматирани во текот на сервисирањето.
По сервисирањето согласно гаранцијата, вашиот производ на Apple или заменски производот ќе ви биде вратен како што бил оригинално конфигуриран вашиот производ на Apple при првичната продажба, заедно со применливите ажурирања. Apple може да инсталира ажурирања на системскиот софтвер како дел од сервисирањето согласно гаранцијата што ќе спречи производот на Apple да се врати во претходна верзија на системскиот софтвер. Апликации од трета страна што се инсталирани на производот на Apple може да не се компатибилни или да не функционираат на производот на Apple како резултат на ажурирањето на системскиот софтвер. Вие ќе бидете одговорни за повторно инсталирање на сите други софтверски програми, податоци и информации. Враќањето и повторното инсталирање на други софтверски програми, податоци и информации не се покриени со оваа гаранција.
Можете да побарате сервис во земјата која не е земјата од каде сте го купиле производот на Apple и во тој случај ќе треба да постапувате според сите применливи закони и прописи за увоз и извоз и ќе бидете одговорни за сите царински давачки, ДДВ и други поврзани даноци и трошоци.
Важно: не обидувајте се да го отворите производот на Apple, освен ако упатството за корисникот не објаснува како треба да се отвори или да отстранувате какви било заштитни капаци прикачени на производот на Apple. Отворањето на производот на Apple или отстранувањето на заштитните капаци може да предизвика оштетување кое не е покриено со оваа Гаранција. Само Apple или овластен давател на услуги на Apple (AASP) треба да извршуваат сервисирање на овој производ на Apple.
ШТО ЌЕ НАПРАВИ APPLE ВО СЛУЧАЈ НА БАРАЊЕ ПО ГАРАНЦИЈАТА?
Доколку за време на гарантниот период поднесете жалба кај Apple во согласност со оваа гаранција, Apple по свој избор ќе го направи следното:
(i) ќе го поправи производот на Apple користејќи нови или претходно користени делови кои се еквивалентни на новите според перформансите и сигурноста, или
(ii) ќе го замени производот на Apple со истиот модел (или со ваша согласност со производ што има слична функционалност) составен од нови и/или претходно користени делови што се еквивалентни на новите според перформансите и сигурноста, или
(iii) ќе ви ги врати парите, а за возврат ќе го вратите вашиот производ на Apple.
Кога одреден производ или дел се заменува или се враќаат парите, секој производ што се користи како замена станува ваша сопственост, а заменетиот или вратениот производ станува сопственост на Apple.
За заменскиот дел или производ или поправен производ на Apple продолжува да важи преостанатиот период од гаранција на оригиналниот производ на Apple или деведесет (90) дена од датумот на замената или поправката, односно она кое што обезбедува подолга покриеност за вас.
За сервис што се бара во земја која не е земјата од каде што е купен производот на Apple, Apple може да ги поправи или замени производите и деловите со слични производи и делови кои одговараат на локалните стандарди.
КАКО ДА ДОБИЕТЕ СЕРВИС СОГЛАСНО ГАРАНЦИЈАТА?
Пристапете и прегледајте ги следните содржини за помош на интернет пред да побарате сервис согласно гаранцијата:
Информации за меѓународна поддршка
www.apple.com/mk/support/
Apple Authorized Service Provider, Овластени препродавачи на Apple и Продавници на мало на Apple
locate.apple.com/mk/en/
Поддршка и услуги на Apple
support.apple.com/en-mk/HT201232
Бесплатна поддршка од Apple
www.apple.com/mk/support/complimentary/
Доколку немате пристап до интернет или производот на Apple не функционира правилно и покрај користењето на овие ресурси, стапете во контакт со претставник на Apple или, доколку е применливо со продавница на мало на Apple („Apple Retail“) или со AASP и тие ќе ви помогнат да утврдите дали на вашиот производ на Apple му треба сервисирање и, доколку е така, ќе ве информираат кои опции за сервис согласно гаранцијата наведени подолу ќе ги обезбеди Apple.
Пред да добиете сервис согласно гаранцијата, Apple или неговите агенти можат да побараат да доставите докази за купувањето, да одговорите на прашања кои се дизајнирани со цел да помогнат при откривањето на потенцијалните проблеми и да ги следите процедурите на Apple за добивање на сервис согласно гаранцијата, како на пример, следење на упатствата за пакување и транспортирање на производи на Apple кога добивате сервис со враќање по пошта, што е опишан подолу.
ОПЦИИ ЗА СЕРВИС СОГЛАСНО ГАРАНЦИЈАТА
Apple ќе обезбеди сервис согласно гаранцијата преку една од следниве опции:
(i) Сервис со лично враќање. Apple може да побара да го вратите вашиот производ на Apple во продавница за малопродажба на Apple или локација на овластен давател на услуги на Apple кој нуди сервис со лично враќање. Вашиот производ на Apple може да биде испратен до сервис за поправки на Apple („ARS“) за да биде сервисиран. Откако ќе бидете известени дека сервисирањето е завршено, ќе го земете производот на Apple од продавница за малопродажба на Apple или од овластениот давател на услуги на Apple (AASP) без одложување, освен ако Apple ве извести дека производот на Apple ќе биде испратен директно до вашата локација од локацијата на сервисот за поправки на Apple (ARS).
(ii) Сервисирање со враќање по пошта.Доколку Apple одлучи да обезбеди сервисирање преку неговиот сервис со враќање по пошта, Apple ќе ви ги испрати однапред платените товарни листови и доколку е применливо, материјал за пакување и упатства за начинот на правилно пакување на производот и адресата што треба да ја напишете за да може да го испратите вашиот производ на Apple до локацијата на сервисот за поправки на Apple (ARS) или овластениот давател на услуги на Apple (AASP). По завршувањето на сервисот, сервисот за поправки (ARS) или овластениот давател на услуги на Apple (AASP) ќе ви го врати производот на Apple. Apple ќе плати за испорака до и од вашата локација доколку се следат сите упатства за методот на пакување и испорака на производот на Apple.
(iii) Сервис за делови „направи сам“ („DIY“). Во рамките на сервисот за делови „направи сам“, Apple ќе ви обезбеди замена на производот или делови и додатоци за производот што лесно се заменуваат, како на пример, глувче или тастатура, кои можат да се заменат без користење на алати. Напомена: Apple не е одговорен за трошоци за работна рака кои може да настанат во врска со сервисот за делови „направи сам“. Доколку ви е потребна дополнителна помош при замената, стапете во контакт со Apple на телефонскиот број наведен подолу или посетете продавница за малопродажба на Apple или овластен давател на услуги на Apple (AASP). Доколку Apple одлучи да обезбеди сервис преку сервисот „направи сам“, ќе се применува следниот процес:
(а) Сервисирање кога Apple бара враќање на заменетиот производ, дел или додаток: Apple може да побара авторизација на кредитна картичка како обезбедување за малопродажната цена на заменетиот производ, дел или додаток и применливите транспортни трошоци. Apple ќе ви испрати заменски производ, дел или додаток со упатства за замена, доколку е применливо, и секакви други услови за враќање на заменетиот производ или дел. Доколку ги следите упатствата, Apple ќе ја откаже авторизацијата на кредитната картичка, така што нема да ви биде наплатено за производот или делот и транспортот до и од вашата локација. Доколку не го вратите заменетиот производ, дел или додаток според упатствата или пак вратите заменет производ, дел или додаток за кој не може да даде сервис, Apple ќе ја наплати авторизираната сума од вашата кредитна картичка. Доколку не сте во можност да обезбедите авторизација на кредитна картичка, сервисот може да не ви биде достапен и Apple ќе ви понуди алтернативни аранжмани за сервис.
(b) Сервисирање кога Apple не бара враќање на заменетиот производ, дел или додаток: Apple ќе ви испрати бесплатно заменски производ, дел или додаток со упатства за инсталација, доколку е применливо, и секакви други услови за располагање со заменетиот производ, дел или додаток.
ОГРАНИЧУВАЊЕ НА ОДГОВОРНОСТ
(i) Целиот договор:
Освен правата коишто ви следуваат согласно правото за заштита на потрошувачите како што е наведено на почетокот на овој документ, сите гаранции, услови и други правила што не се наведени во овој документ за гаранција се исклучени од Едногодишната гаранција на Apple. Одредени земји не дозволуваат ограничувања на траењето на гаранциите, условите и/или имплицитните одредби, така што ограничувањата опишани погоре може да не важат за вас.
(ii) Оградување во однос на податоците:
Apple не гарантира, изјавува или презема одговорност дека ќе биде во можност да поправи или замени кој било производ на Apple во рамките на оваа гаранција без ризик од и/или губење на информации и/или податоци зачувани во производот на Apple.
(iii) Ограничување на одговорност:
Во никој случај Apple нема да биде одговорен за:
a) какви било загуби што не се предизвикани поради прекршување на овој документ за гаранција од наша страна;
b) какви било загуби или штети што во моментот на купувањето на вашиот производ, не можело разумно да се предвиди дека може да настанат како резултат на прекршувањето на овој документ за гаранција од страна на Apple; или
c) загуби што се поврзани со вашиот бизнис, загуба на добивка, губење на податоци или губење на можности.
Одредбите од овој документ за гаранција не се применуваат при (i) смрт или лична повреда, (ii) измама или грубо невнимание; или (iii) измамничко погрешно претставување; или (iv) каква било друга одговорност што не може да се ограничи или исклучи со закон.
ОПШТО
Ниту еден препродавач, агент или вработен на Apple не е овластен да врши какви било измени, проширувања или дополнувања кон оваа гаранција.
Доколку за која било одредба се најде дека е незаконска или неизвршлива според законот, таа ќе се оддели од оваа гаранција и нема да влијае врз законитоста или извршливоста на другите одредби.
На оваа гаранција се применува и истата се толкува во согласност со законите на земјата во која е купен производот на Apple.
© 2016 Apple Inc. Сите права се задржани. Apple и логото на Apple се трговски марки на Apple Inc. регистрирани во САД и други земји.
071816-EMEA-VAD-Universal-Warranty-Macedonian-v1.2